प्रदेश ३ मा ९ प्रतिशतमात्रै रोपाई (विवरणसहित)

हेटौँडा-६ पुतलीबजारमा रोपाई गर्दै महिलाहरु ।

१५ असार, हेटौँडा । आज असार १५ अर्थात राष्ट्रिय धान दिवस । तर पर्याप्त बर्षा नहुँदा ३ नम्बर प्रदेशका किसानहरुले भने खुशीयालीसंग दिवस मनाउन पाएका छैनन् । ३ नम्बर प्रदेशको १३ जिल्लामा अहिलेसम्म नौ प्रतिशत मात्र क्षेत्रफलमा मात्र रोपाई भएको छ ।
३ नम्बर प्रदेशको धान रोपाई हुने एकलाख ३४ हजार सातसय २२ हेक्टरमध्ये हालसम्म दशहजार आठसय १२ हेक्टर क्षेत्रफलमा मात्रै रोपाई भएको ३ नम्बर प्रदेश भूमि व्यवस्था, कृषि तथा सहकारी मन्त्रालयले जनाएको छ ।
प्रदेश ३ का भूमि, व्यवस्था कृषि तथा सहकारी मन्त्रालय हेटौंडाका प्रवक्ता निर्मलकुमार गदालका अनुसार पर्याप्त बर्षा नहुँदा असार १५ सम्म रोपाईको अवस्था कमजोर छ ।
यस्तो छ अवस्था
सबैभन्दा बढी काभ्रेपलाञ्चोकमा रोपाई भएको छ । काभ्रेपलाञ्चोकको धान उत्पादनको कुल क्षेत्रफल दशहजार एकसय रहेकोमा हालसम्म दुईहजार २० हेक्टर क्षेत्रफलमा रोपाई सम्पन्न भइसकेको छ । सबैभन्दा कम सिन्धुलीका भएको छ । सिन्धुलीको धान उत्पादनको कुल क्षेत्रफल १६ हजार आठसय ८२ हेक्टर रहेकोमा हालसम्म तीनसय २५ हेक्टर क्षेत्रफलमा मात्रै रोपाई भएको छ ।  
ललितपुरमा चारहजार ६ सय हेक्टर क्षेत्रफलमध्ये सातसय ८२ हेक्टर क्षेत्रफलमा रोपाई भइसकेको छ । काठमाडौंको सातहजार आठसय ८० मध्ये एकहजार २४ हेक्टरमा, भक्तपुरको चारहजार तीनसयमध्ये पाचसय १६ हेक्टरमा , सिन्धुपाल्चोकको १२ हजार दुईसय ३५ मध्ये एकहजार आठसय ३५ हेक्टर क्षेत्रफलमा रोपाई भईसकेको मन्त्रालयले जनाएको छ । 
मकवानपुर जिल्लाको कुल एघार हजार क्षेत्रफलमध्ये हालसम्म एकहजार एकसय, रामेछापको आठहजार आठसय दश हेक्टरमध्ये चारसय ४१ हेक्टरमा, दोलखाको दुई हजार नौसय २० मध्ये एकसय ४६ हेक्टरमा, नुवाकोटको १४ हजार पाँचसय ५० मध्ये एकहजार १९ हेक्टरमा, रसुवाको एकहजार दुईसय ४५ मध्ये पचास हेक्टरमा र धादिङको १२ हजार हेक्टर क्षेत्रफलमध्ये  आठसय ४० हेक्टर क्षेत्रफमा मात्रै रोपाई भएको छ ।