मनहरीका युवामा कोरोना नभएको पुष्टि

सांकेतिक तस्विर

१५ चैत, हेटौंडा । उच्च ज्वरो आएपछि भरतपुरस्थित कोरोना विशेष (अस्थायी) अस्पताल पठाईएका मनहरीका युवामा कोरोना नभएको पुष्टि भएको छ । चैत १२ गते भरतपुर पठाईएका उनमा कोराना नभएको पुष्टि भएको पत्रकार शिवकुमार काशीले जानकारी दिए । 

कोरोना विशेष अस्पतालले राष्ट्रिय जनस्वास्थ्य प्रयोगशालामा पठाएको खकार परीक्षणको शनिबार अबेर आएको रिपोर्टमा उनमा कोरोना नभएको पुष्टि भएको मनहरी गाउँपालिका स्वास्थ्य संयोजक टिकाराम अधिकारीले जानकारी दिएको काशीले बताए । विदेशबाट फर्किएका उनलाई उच्च ज्वरो आएपछि मनहरी स्वास्थ्य केन्द्रमा जाँच गराईएको थियो । अस्पतालले थप जाँचका लागि उनलाई भरतपुर पठाईएको थियो । अस्पतालले कोरोनाबारे एकिन गर्न खकार संकलन गरी युवालाई घर फर्काएको थियो ।

उनी घरमै सावधानीपूर्वक बसेका थिए । विदेशबाट फर्किएको र सामान्य अवस्था झैं गाउँमा हिडिरहेको अवस्थामा एक्कासी उच्च ज्वरो आएपछि मनहरीभरी उनलाई कोरोनाको आशंकामा गलत हल्ला चलेको थियो । गलत हल्लाका कारण मानसिक रुपमा चिन्ता बढेको उनले स्थानीयलाई बताउँदै आएका थिए । उनलाई कोरोना नभएको पुष्टि भएपछि मनहरीमा समेत उत्साह छाएको छ ।
यो पनि पढ्नुस

मकवानपुरबाट उच्च ज्वरोका एक विरामी भरतपुर रिफर, दुई सेल्फ क्वारेन्टाईनमा