मनहरी गाउँपालिकामा शैक्षिक अन्तरक्रिया

२० माघ,हेटौंडा। विद्यालयका प्रधानाध्यापक तथा विव्यस अध्यक्षहरुलाई भेला गरी मनहरी गाउँपालिकाले शुक्रबार शैक्षिक अन्तरक्रिया गरेको छ । गाउपालिका अध्यक्ष एकराज उप्रेतीको सभाध्यक्षतामा भएको कार्यक्रममा साबिक हाँडीखोला र मनहरी गाविसका ३२ वटा सामुदायिक विद्यालयका अध्यक्ष तथा प्रअहरु, ९ वटै वडाध्यक्षहरु, गाउँकार्यपालिका सदस्यहरु सहभागी थिए ।

भेलामा मकवानपुरका जिल्ला शिक्षा अधिकारी बद्री शर्मा भट्टराईले स्थानीय तहमा आएको अधिकार सही सदुपयोग गरी मनहरीको शिक्षा क्षेत्रलाई उत्कृष्ठ र नमूनालायक बनाउन आग्रह गरे । भेलामा सहभागी शिक्षकले गाउँपालिकामा शिक्षा क्षेत्र हेर्ने अधिकारी नभएका कारण विद्यालय सञ्चालनमा समस्या आएको बताए ।

कार्यक्रममा मनहरी श्रोतकेन्द्रका श्रोतव्यक्ति रमेश शर्मा पराजुलीले मनहरी क्षेत्रमा कक्षा छोड्ने दर, १९ दशमलब ५ प्रतिशत र कक्षा दोहो¥याउने दर १९ दशमलब २ प्रतिशत रहेको बताए । मनहरी गाउँपालिकामा ८ वटा मावि रहेको र मावि दर्बन्दीका शिक्षक ११ जना मात्रै रहेको बताए । कक्षा १–८ सञ्चालन भएका विद्यालय १२ वटा रहेको र निमावि दर्बन्दी १४ वटा मात्रै रहेको बताए । 

गाउँपालिका कार्यकारी अधिकृत किसान न्यौपानेले गाउँपालिकाको खातामा आएको सशर्त अनुदानका रकम विद्यालयको खातामा पठाउन बिबिध समस्या रहेको बताए । गाउँपालिका उपाध्यक्ष मनिला बिष्टले भेलाबाट आएका सुझाव संकलन गरी शिक्षा क्षेत्रका विकासका लागि मार्गचित्र निर्माण गरिने बताइन् ।